Vieiros

"Estamos polo tanto diante dun claro caso de desbalde de cartos públicos da Deputación e tamén dun caso de trato de favor por decreto: trato de favor á empresa contratada para organizar estes eventos, trato de favor a derterminados concellos escollidos para acoller estes concertos, e incluso, coma no caso de Barreiros vai de gala, trato de favor tamén a unha promotora-inmobiliaria que aproveitou o evento organizado polo Concello e a Deputación para facer publicidade das súas promocións". Así o explicou este mércores o deputado nacionalista Antón Veiga, para quen resulta "sospeitosa" a relación "concello-deputación-promotora", advertindo que se están usando fondos públicos para promocionar un negocio privado.

Os representantes do BNG na Deputación piden que se lles dea explicacións no pleno da institución sobre a empresa ou empresas coas que se realizan estas galas e os criterios que se seguiron para a contratación dos eventos. De paso, esixirán as certificacións presentadas polos Concellos polos gastos das galas. "É significativo que Cacharro siga negándolle achegas económicas ao parque de bombeiros da Mariña Oriental e Central, ubicado en Barreiros, e pola contra gaste os cartos en eventos musicais de dubidosa calidade".

Ao fío da queixa lembran que a Deputación non ten "ningunha programación nin planificación dirixida ao conxunto dos concellos da provincia onde encaixen estes espectáculos" e láianse de que deica agora "o reparto discrecional" destas axudas supuxo xa un gasto de 125 mil euros que "poderían ter servido para elaborar esa programación cultural solicitada polo BNG e da que se benficiaría o conxunto de concellos da provincia".