Vieiros

O coordenador provincial do PSdG coruñés, Moisés Rey, aseguraba que a dirección do partido estaba "sorprendida" logo de saber por medio do xornal La Opinión que o alcalde de Cambre e mailo seu ex concelleiro de Urbanismo, Xosé Luís Muñíz, constituíran a medias unha empresa construtora. Con esta sociedade, en unión doutros empresarios, os dous políticos edificaron e venderon varios edificios de vivendas en Sada. Cabe lembrar que este último concello, gobernado polo coñecido Ramón Rodríguez Ares (PP), está no centro de moitas polémicas polas continuas denuncias urbanísticas. O alcalde de Cambre e mailo daquela concelleiro de Urbanismo fundaron hai case oito anos a sociedade Laguna Hogar, S.L.

A noticia non causou especial sorpresa na bisbarra coruñesa. Nos últimos meses véñense publicando diferentes artigos sobre polémicas actuacións urbanísticas dos seus alcaldes. Escándalos deste tipo teñen afectado o alcalde de Arteixo, Manuel Pose Miñones (PP); o de Oleiros Ángel García Seoane (independente); ou ao ex rexedor herculino, Francisco Vázquez (PSdG). Aínda así, o fenómeno non é, nin moito menos, exclusivo da zona. En Nigrán o alcalde popular Alfredo Rodríguez Millares vén de retirar un polémico Plan Xeral pola gran presión dos veciños, que consideran que detrás do mesmo hai evidentes irregularidades e intereses espurios.

Quen nos defende da especulación?

Mentres tanto, é máis que evidente que o sistema non dispón de mecanismos legais efectivos que freen un dos principais cancros da política local. Un exemplo é o que ocorre no noso país. O Servizo de Protección da Natureza (Seprona) da Garda Civil é o organismo encargado de perseguir construcións ilegais en zonas protexidas. A Xunta tamén dispón de inspectores para vixiar, especialmente, a zona costeira. Pero o problema é outro: Ninguén se encarga de investigar as corruptelas que rodean o urbanismo e que a miúdo involucran a políticas e empresarios do sector.

Logo do supino escándalo de Marbella e, diante da alarma social, o Goberno central prometeu crear un grupo de axentes dedicados exclusivamente a investigar tramas urbanísticas. Segundo os últimos datos, o executivo socialista que 260 axentes se encarguen desta función en todo o ámbito estatal. En Galiza funcionará no vindeiro ano unha pequena brigada deste tipo. Aínda así, nestes momentos o Goberno galego non dispón de mecanismos propios para a loita anticorrupción. Unha das promesas deste goberno é a creación dunha verdadeira Policía Autonómica que comezará a dar os seus primeiros pasos en 2008. A pregunta é se o corpo terá competencias para loitar contra as tramas urbanísticas.

O que resulta máis evidente é que hai unha cada vez máis fonda preocupación na cidadanía. O debate sobre o feísmo que sofre o país está a maior parte das veces vinculado a flagrantes irregularidades urbanísticas. As denuncias de particulares e colectivos non paran de medrar nos xulgados, que, tamén recoñecen dificultades para a investigación. Tampouco axuda a decisión de moitos políticos locais de non "xudicializar" a política, aínda que a veces os indicios delitivos nalgúns concellos semellen evidentes.

Dimisión en Cabanas

Modesta Anca, a rexedora socialista que desde 1983 estaba á fronte do Concello de Cabanas, anunciou este xoves que deixaba o cargo, tal e como llo esixira a executiva do PSdeG, despois de que recentemente fora condenada a oito anos de inhabilitación por delito urbanístico. Inicialmente, Anca rexeitara deixar o posto, xa que a sentenza aínda non é firme e a alcaldesa consideraba que era froito dun erro de xestión e confía en finalmente a xustiza avale a súa inocencia. O castigo xorde dunha licenza de obra concedida para a construción dunha ducia de vivendas en San Martín do Porto, preto da desembocadura do Eume, proxecto que tiña informe desfavorábel da aparelladora municipal e autorizado durante as vacacións desta polo seu substituto.