Xa se coñecen os gañadores da categoría musical de GZ Crea, certame de novos creadores convocado pola Dirección Xeral de Xuventude, dependente da Vicepresidencia da Xunta. Os vencedores foron o grupo de ska Dandy Fever, que chegaran á final cos seus temas Cara a min e Debulla meu. O segundo premio foi para a música electrónica de Telémaco e o terceiro para o rap de Os trasnos de Moscoso. Foron finalistas, ademais, Silvia Álvarez Baamonde, Moita Leria e Color Café. No blog A Regueifa pódense ver imaxes e vídeos das actuacións dos tres premiados, entre outros. Así foi a actuación de Dandy Fever:
Outras categorías de GZ Crea xa teñen gañadores. O 9 de novembro celebrouse en Vigo o desfile da categoría de moda, que tivo como gañadora a Lorena Rodríguez Blanco, a Saray Fernández Marques como segunda clasificada e a Carolina González García como terceira. O día 6 expuxeron as súas obras diante do público do Microfest 4, en Compostela, os finalistas da categoría graffiti, na que saíron premiados Javier Ramírez Troncoso, José Cousiño González e Pablo Silva Fernández. Os gañadores da especialidade fotografía, Iago Eireos Franco, Patricia Valverde Esteiro e Francisco José Miguens Ferro, recollerán os seus premios o día 24 ao mediodía na Casa da Xuventude de Ourense. Por outra banda, as seis obras de teatro finalistas representaranse do 28 ao 30 de novembro nos concellos de Arteixo e Carballo.
En artes plásticas, foron premiados María Marticorena Cabezas, Santiago Jiménez Jiménez e María Rodríguez Piñeiro. Os seus traballos pódense admirar na web de GZ Crea. Na categoría vídeo, recibiron os premios Carmen Yanira Heredia Vázquez, pola obra Paralelo; Carlos Seijo Canosa, con Elevation, e Roberto Conde Suárez, autor de Entrambosmundos. O 18 de decembro celebrarase no auditorio do centro cultural Caixanova de Vigo a gala final de entrega de premios GZ Crea 2006, na que se proxectará o primeiro premio de vídeo e se representará a obra de teatro gañadora.