Vieiros

Cada un dos concellos beneficiados polo acordo conta cunha media de 45 hectáreas arredor dun mínimo de 10 núcleos de poboación. O custo dos labores de prevención será de 775 euros por hectárea, que financiará a Consellería do Medio Rural. Co obxectivo de implicar a sociedade na prevención dos lumes, serán os concellos os responsábeis de elaborar plans concretos nos que especifiquen as zonas e as modalidades de execución dos labores de limpeza, que han de estar rematados antes do 30 de maio.

Resposta ao PP A consellaría respondeu ás críticas do Partido Popular sobre a elaboración da Lei de prevención e defensa contra os incendios forestais. A oposición acusaba a Medio Rural de falta de diálogo cos sectores afectados e avogaba por seguir o Plan Galicia Verde redactado polo propio PP. Segundo a consellaría dirixida por Suárez Canal, a lei foi consensuada e conta cun amplo apoio entre os propietarios forestais. Medio Rural di, ademais, que os populares seguen instalados na estratexia da crispación e dilación, a mesma que amosaron durante a vaga de incendios do verán pasado.