Vieiros

O proxecto ten como obxectivo atopar con precisión minas e munición non utilizada en campos de cultivo, convertidos unha vez en campos de batalla. En moitos países en vías de desenvolvemento milleiros de campos de cultivo están inutilizados; os labregos teñen medo de volver a traballa-la terra. Sesenta persoas morren ou quedan gravemente mutiladas ó día por cousa das minas. A Cruz Vermella estima que hai entre 80 e 120 millóns de minas, dispostas para facer dano, espalladas en 70 países de todo o mundo. 40.000 novas minas despréganse tódalas semanas. A idea de utiliza-las abellas para detecta-los explosivos parte da idea de que mentres os insectos buscan néctar e pole, van recollendo as partículas de po que liberan as bombas e que, á volta, levarán ás súas abelleiras. Moitas destas partículas de po quedan pegadas ós corpos dos insectos pola carga eléctrica estática dos seus corpos. As colmeas das abellas buscaminas son especiais. Son artificiais e levan aparellos electrónicos para poder le-los sinais de identificación emitidos polas "mochilas" das abellas.
En maio deste ano xa se fixeron varios ensaios. Un grupo de abellas foi equipado cos microtransmisores para investiga-lo seu comportamento nun campo de minas. A radiofrecuencia da emisión non interfire coa actividade das abellas e o peso dos aparellos é moi pequeno. Así a todo, aínda teñen que ser máis pequenos para diminuí-lo impacto no voo das abellas. Con outro grupo formado por 50 abellas, os Laboratorios Nacionais Sandia dos E. U. A., investigan cal é a extensión do campo de acción das abellas e os tempos de ida por vinda á abelleira. Neste estudio, un lector rastrexará a cada abella, en canto deixe a colmea na busca de alimento, esculcando a súa dirección e o tempo que tarda na volta. Tamén están a desenvolver un sistema de ferramentas para escruta-la posible presencias de substancias químicas como o TNT.

Outra liña de investigación é a busca das especies ou variedades de plantas, que con maior eficacia, recolla os residuos de explosivos liberados polas minas, e destas plantas aquelas que permitan o paso dunha maior cantidade de explosivos ás flores e ó pole.
Unha das metas do equipo da Universidade de Montana é poder adestrar ás abellas para asocia-lo cheiro dos explosivos, por exemplo o TNT, co cheiro do seu alimento. Desta maneira, as abellas pasarían máis tempo preto das plantas e dos solos contaminados con TNT, aumentando as probabilidades de que poidan leva-los posibles residuos de TNT.
Máis información.