Vieiros

O secretario xeral de Relacións Institucionais, Antón Losada; Carme Adán, secretaria xeral de Igualdade; María Xesús Lago, secretaria xeral do Benestar; e os directores xerais de Xuventude e Solidariedade e de Acción Social, Rubén Cela e Bieito Seara, acompañaron a Anxo Quintana este mércores na Casa da Parra, na Praza da Quintana en Santiago de Compostela, na presentación oficial do equipo da nova Vicepresidencia de Igualdade e Benestar.

Quintana definiu ao grupo coma un conxunto de "xente nova e emprendedora, sen medo a asumir responsabilidades e sen medo ao compromiso" e lembrou o compromiso adquirido de "poñer a Administración ao servicio da xente e facela mais áxil", subliñando a reducción de seis direccións xerais a dúas neste departamento. Coma meta do equipo fixou a loita por que "ninguén quede abandonado á súa sorte" e "ningunha galega nin galego poida dicir que o seu goberno lles negou as oportunidades de mellorar e prosperar".

Ao tempo, o vicepresidente insistiu en que o bipartito se comportará "sempre" coma o "goberno dunha nación" e asegurou que durante os próximos catro anos "temos que educar a Madrid no respecto a Galiza".