Vieiros

"China ten unha activa rede de informadores fóra do país que regularmente lle informan ao servizo de espionaxe da actividade dos disidentes". É un exemplo de texto imposíbel de ler en China, que pode atoparse no espazo do Free China Movement, que loita pola democratización daquel país, e que a web Irrepressible, de Amnistía Internacional, recolle entre os exemplos para que os internautas incorporen ás súas propias páxinas personais. A lista inclúe moitas outras webs: a de Human Rights in China; o colectivo persa de loita a prol dos dereitos das mulleres, Women in Iran; a web da asociación iraní de lesbianas, gais e bisexuais, PGLO; o foro de promoción dos dereitos humanos en Usbequistán, Open Society Institute... e moitos outros.

Amnistía Internacional aproveita ademais para presentar un novo informe sobre a represesión en internet, afondando no caso chinés, onde o colectivo considera que as prácticas represivas no ámbito tecnolóxico se perfeccionaron máis nos últimos tempos, e onde a asociación apunta directamente ao papel xogado polos grandes xigantes da informática: Microsoft, Google e Yahoo, ás que acusa de amosárense "especialmente dispostas a cooperar co goberno chinés". "Internet pode ser unha extraordinaria ferramenta para a promoción dos dereitos humanos e os activistas poden relatarlle ao mundo os abusos cometidos no seu país con só mover o rato e axudarlle á xente a acceder nun grao sen precedentes a información da máis ampla variedade de fontes", destacan edsde Amnistía.