Vieiros

"Estamos dispostos a acudir ao Consello Superior de Deportes, ao Comité Olímpico ou incluso á xustiza ordinaria". Así de contundente amosábase Alfredo Bea en relación coa última polémica suscitada entre palistas galegos e a Federación Española.

A orixe da desputa está nos Xogos de Atenas. "Despois das olimpíadas non quixeron saber nada de nós, o único que conseguimos foi unha beca de 1.200 euros e 300 para pagar ao adestrador". Aínda así, neste último ano Bea conseguiu ser subcampión do mundo en maratón e quinto no C-2 xunto a David Mascato, ademais de arrasar nos últimos campionatos de España.

Agora a Federación quere volver contar cos dous palistas pero baixo unhas condicións que consideran "inaceptábeis". "Queren que adestremos cun preparador de sub-23 e iúniors que nin sequera ten o título oficial" di Bea, que demanda que lles deixen proseguir coa preparación que xa comezaron hai dous anos pensando na cita olímpica.

Segundo o campión estatal, a Federación ten un "continuo desprezo" cara aos piragüistas galegos e sinala que o obxectivo da institución é destruír a súa planificación. Alfredo Bea asegura ademais que están dispostos a acudir aos pertinentes controis e a competir en igualdade de condicións cos outros aspirantes olímpicos demostrando quen é o mellor representante para os xogos cos resultados.