Vieiros

As editoriais Galaxia, Edicións do Cumio e Ediciós do Castro uníronse no ambicioso proxecto da Diciopedia do século 21, un dicionario enciclopédico en galego que consta de tres tomos, con 2.600 páxinas e 125.000 entradas. Os responsábeis das tres editoriais, Víctor Freixanes, Antonio Mascato e Isaac Díaz Pardo, foron os encargados de presentar a nova obra, que nace despois de catro anos de traballo conxunto. A publicación aspira a estar en todas as bibliotecas e centros de ensino de Galiza, sen esquecer os andeis dos fogares. Sairán á venda catro mil exemplares ao prezo de 290 euros e cunha medalla conmemorativa deseñada por Díaz Pardo como agasallo.