Vieiros

Dous novos socios forman parte desde 2007 do conxunto da Unión Europea: os 21 millóns de cidadáns de Romanía e os máis de sete millóns de Bulgaria forman parte desde o comezo deste ano dun espazo que inclúe xa arredor de 500 millóns de persoas. Trátase da primeira ampliación desde a entrada en 2004 de dez novos membros, sumando xa un total de 27 países. Mentres o resto de executivos europeos deciden sobre a aceptación ou non da libre circulación de traballadores romaneses e búlgaros, os novos socios acceden á súa cota de poder, e terán dereito a obteren dous eurocomisarios e a sentar 53 eurodeputados no Parlamento Europeo. Por outra parte, desde o 1 de xaneiro accede Alemaña á presidencia de quenda da UE e Eslovenia adopta oficialmente o euro como moeda.