Vieiros

Nunha información publicada esta semana por Libertad Digital, asegurábase que Losada despedira a súa asistenta de fogar sen indemnización. Segundo o xornal madrileño, a traballadora, que escribiu unha carta denunciando o caso, non tiña seguro e foi despedida logo de pedir un aumento salarial.

A través dun comunicado oficial, Losada lembra que hai un decreto que sinala que o servizo doméstico a tempo parcial non precisa contrato a través do servizo público de emprego. Di ademais que ao ser un contrato verbal por menos de 80 horas ao mes é responsabilidade do traballador dispor de seguro, e que efectivamente a súa asistenta o tiña, “proba diso é que cando lamentabelmente sufriu unha grave enfermidade o seu seguro fíxose cargo da baixa”.

En contra da información publicada, Antón Losada tamén asegura no comunicado que a traballadora non tivo responsabilidade na educación e coidado da súa filla e subliña que deixou voluntariamente o emprego “porque tiña ofertas mellores”.

Apoio de Quintana

Pola súa parte, o vicepresidente da Xunta, Anxo Quintana, amosou na mesma tarde do sábado o seu apoio a Losada. Nesta liña, logo do Consello Nacional do BNG, o voceiro nacionalista dixo que non comenta "mentiras nin contribúo a facer noticias das mentiras”.