Vieiros

Vieiros de meu Perfil


Edición xeral

RSS de Edición xeral
Plan de Desenvolvemento Integral

A Xunta e o Estado achegarán 1.163 millóns para revitalizar Ferrolterra

O proxecto prevé un investimento global de 3.000 millóns de euros, dos que máis dun terzo procederán de recursos públicos. O obxectivo é que, de cara ao ano 2011, se inverta o proceso de regresión económica das últimas décadas nas comarcas de Ferrol, Eume e Ortegal.

Redacción - 18:09 12/03/2007
Vista de Ferrol / Foto: Xaime.net

Vista de Ferrol / Foto: Xaime.net

O executivo pretende que a bisbarra medre un 16% nos vindeiros cinco anos, o que supoñería multiplicar por catro o ritmo medio dos últimos 25 anos. Cumprilo levaría consigo a creación de 4.400 novos postos de traballo e 3.000 millóns de euros de valor engadido.

O plan terá once sectores de actuación prioritaria, entre os que destacan o eólico, o turístico, o loxístico, os biocombustíbeis e o naval. Con respecto a este último, estabelécese como obxectivo crear o clúster do naval e apostar pola diversificación e tecnificación do sector. Así mesmo, entra dentro deste plan poñer en marcha o centro tecnolóxico naval de Ferrol e asegurar o traballo de Navantia.

Segundo o Goberno, o investimento privado acadará os 2.000 millóns de euros, aos que habería que sumar os 1.163 de fondos públicos. Destes últimos, 828 destinaranse á dotación de infraestruturas e 335 serán incentivos á actividade económica. O 55% do diñeiro procederá de fondos da Xunta e o 45% restante, do Estado.

Mellora das infraestruturas
O investimento en infraestruturas é, para o executivo, fundamental para que o plan teña éxito. Inclúe a posta en marcha do porto exterior de Ferrol, o saneamento integral da ría e o remate da autovía entre a cidade e Vilalba e da vía Ferrol-San Cibrao. Nestas dúas últimas obras estanse a investir máis de 400 millóns de euros.

No referente ao desenvolvemento de terreo industrial, o presidente da Xunta anunciou que existe un compromiso coa SEPI para liberar 200.000 metros cadrados dos terreos ociosos de Navantia Fene para o seu aproveitamento. O Goberno comprometeuse, ademais, a que todas as dársenas e peiraos do país teñan conexión ferroviaria, incluído o porto exterior ferrolán.


3.75/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: