Vieiros

Logo de belixerantes posicións contra o favorecemento do galego nas aulas, e moi especialmente contra as galescolas, os populares propoñen agora as trilingüescolas. Galego, español e inglés. "Unha boa maneira de exportar o galego e a cultura polo mundo é sabendo un terceiro idioma", afirmou o presidente do PPdeG, Alberte Núñez Feijoo.
Desde o PPdeG consideran que o recente consenso dos tres grupos parlamentarios "para garantir o ensino bilingüe" é abondo para a normalización do galego e afirman que o proxecto de lei agora presentado servirá para "darlle continuidade" ao decreto.

Con todo, o conxunto de iniciativas presentadas polos populares inclúe apostas importantes para a mellora do ensino doutras linguas, como é o estabelecemento dun "cupo suficiente" de profesores que sexan capaces de ensinar materias non lingüísticas noutros idiomas.

Son media ducia de ideas para que mozas e mozos de Primaria e Infantil dominen tres linguas "en canto cumpran os 18 anos". Así, alén do galego e o español, os rapaces estudarían un terzo das materias noutra lingua. Unha iniciativa que, en opinión dos populares, serviría para facerlle fronte "aos retos derivados da integración na Unión Europea e a crecente globalización económica e social".

Desde o curso 2007-2008
O PPdeG considera que sería posíbel que desde o próximo curso todos os centros públicos inclúan tamén programas de "anticipación da lingua estranxeira" no segundo ciclo da educación infantil, entre os 3 e os 6 anos de idade. Lembran que neste momento só algúns centros inclúen no último curso de infantil unha hora á semana de inglés.

Piden ademais que se impulse a introdución de "seccións europeas" en centros de ESO, Bacharelato e Formación Profesional, que contribúan a reforzar a aprendizaxe dunha lingua estranxeira, incorporándoa a outra materia. O proxecto inclúe a chamada a fixar por lei un compromiso explícito da Xunta para incrementar o número alumnos e profesores que participen "en programas de mobilidade transnacional orientados a impulsar o perfeccionamento de linguas estranxeiras".