Vieiros

Vieiros de meu Perfil


Fwwwrando

RSS de Fwwwrando
Tecnoloxía WiMAX

Medio Rural quere rachar coa fenda dixital nos Ancares e no Courel

A consellaría pretende “xeneralizar” o acceso a internet neste Lugar de Interese Comunitario.

Redacción - 09:30 18/03/2007
O sinal chegará ás serras grazas á tecnoloxía WiMAX

O sinal chegará ás serras grazas á tecnoloxía WiMAX

As serras dos Ancares e do Courel disporán de conexión sen fíos a internet. Así o anunciou este sábado o director xeral de Desenvolvemento Rural, Edelmiro López, xunto co de Estruturas e Infraestruturas Agrarias, Xosé Carballido, na presentación de resultados do plan de desenvolvemento da zona na localidade luguesa de Navia de Suarna.

O sinal chegará a estas zonas grazas á tecnoloxía WiMAX, un estándar de transmisión sen fíos de datos que proporciona conexión en áreas de até 48 quilómetros de radio e a velocidade de até 70 Mbps. Trátase dunha tecnoloxía que non require de visión directa coas estacións base.

Segundo Carballido, o proxecto tecnolóxico constitúe unha iniciativa “ambiciosa” e asegurou que ao longo deste 2007 se prevén resultados “palpábeis” pola implantación desta infraestrutura. Destacou ademais que se realizarán cursos de familiarización co manexo da informática, o teletraballo ou o comercio electrónico.

O plan tecnolóxico da consellaría para estas zonas tamén inclúe a creación dun proxecto piloto de detección remota de incendios e outro de vixilancia ambiental, así como a xeneralización dos puntos de información e de conexión á Rede ao longo do camiño de Santiago. Co obxectivo de fixar a poboación desta zona, tamén se recolle a necesidade de aplicar estas novas tecnoloxías nos centros educativos da área como recurso de aprendizaxe, así como na relación entre as pequenas e medianas empresas e os traballadores do Lugar de Interese Comunitario.


4.33/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: