Vieiros

Vieiros de meu Perfil


Edición xeral

RSS de Edición xeral
Desequilibrios nos prezos por mor da desigualdade

Coca-Cola máis barata cá auga, casas máis baratas ca coches

O difícil acceso á auga potábel en Quenia e a crise da industria en Detroit provocan situacións paradoxais.

Redacción - 13:29 21/03/2007
Pescadores no Lago Victoria / Foto: Demosh

Pescadores no Lago Victoria / Foto: Demosh

Nun país como Quenia, que ten o segundo lago meirande do mundo e está a carón do río Nilo, a auga é un ben tan valioso que resulta máis cara ca a Coca-Cola. Este paradoxo denunciouno o alcalde adxunto de Nairobi, Waititu Ndungu, presente na primeira asemblea mundial dos representantes electos e dos cidadáns pola auga, organizada polo Parlamento Europeo. A xuntanza pretende propoñer solucións que melloren o acceso a un ben fundamental do que carecen máis de mil millóns de persoas.

Para Ndungu, o principal problema no seu país é que a auga se converteu nun tema político e que non se xestiona ben. De feito, cando o Foro Social Mundial se reuniu en Nairobi, o principal gasto que houbo que asumir foi o da compra de auga envasada, pola recomendación de non beber da billa. Boa parte do líquido do país africano é consumido por empresas privadas de bebidas e de floricultura, mentres o 80% da poboación non pode acceder a el.

Casas a prezo de saldo
Mentres, na cidade estadounidense de Detroit o prezo da vivenda caeu tan de golpe que xa é máis barato mercar unha casa ca un coche. O mercado inmobiliario atópase nunha grave situación a consecuencia da crise da industria automobilística, que provocou unha depresión económica. O paro acada en Detroit o 14% e un terzo da poboación está por debaixo do limiar da pobreza.

A incapacidade dos habitantes da cidade para pagar as súas hipotecas está a facer descender os prezos a niveis alarmantes. Casas que hai dous anos se vendían por 70.000 dólares pódense mercar agora pola metade, ou mesmo menos. Os bancos están a sacar a poxa as casas de clientes que non poden soportar pagar xuros sete veces superiores á media do país.


4.6/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Vista nocturna de Detroit
Vista nocturna de Detroit