Vieiros

Vieiros de meu Perfil


Edición xeral

RSS de Edición xeral
Pioneira a nivel mundial

O Goberno apoia a planta que elaborará combustíbel a partir de biomasa

Galiza vai contar coa primeira planta de produción combinada de enerxía eléctrica e biocarburante do mundo. Touriño apoia a iniciativa.

Redacción - 13:51 03/04/2007
Planta de Abengoa, en Curtis

Planta de Abengoa, en Curtis

O presidente do goberno, Emilio Pérez Touriño, manifestou este martes o apoio da Xunta ao proxecto de valorización de biomasa forestal mediante gasificación -pioneira a nivel mundial-, que o grupo Abengoa ten pensado implantar en Galiza, a través de XesGalicia.

O titular da Xunta mantivo unha xuntanza con Felipe Benjumea, responsábel do grupo, quen lle presentou o proxecto. Este contará cun investimento próximo aos 100 millóns de euros, e suporá a creación de entre 18 e 35 empregos directos e entre 145 e 280 indirectos.

Primeira planta no mundo

Galiza acollerá, deste xeito, a primeira planta de produción combinada de enerxía eléctrica e biocarburante no mundo, unha estratexia pioneira na valorización da biomasa pola súa capacidade e innovación.

Con esta iniciativa o país vaise converter en referente mundial nas tecnoloxías de produción de carburantes. Ademais, segundo as previsións de Abengoa, a emisión de CO² fósil reducirase en 2.000 millóns de toneladas por ano, e permitirá valorizar anualmente 87.500 toneladas de biomasa forestal.

Subvencións da Xunta

Benjumea sinalou que o proxecto, que se desenvolverá en Curtis e en Sogama, "pasa pola produción de bioetanol de segunda xeración, a partir de biomasa, mediante gasificación e síntese química", o que representa "a mellor alternativa actual para a valorización da biomasa forestal".

O Executivo comprometeuse a prestarlle a máxima colaboración á factoría na procura de axudas, subvencións e incentivos de I+D, a través dos distintos instrumentos financeiros e organismos administrativos da Xunta.

Segundo produtor mundial

Abengoa é un grupo industrial formado por 302 sociedades. Abengoa SA, a sociedade dominante do grupo, foi constituída en Sevilla en xaneiro de 1941. Abengoa Bioenergía é o grupo de negocio encargado de desenvolver e producir biocarburantes (bioetanol e biodiésel, entre outros).

Dentro desta área de negocio encádrase Bioetanol Galicia, S.A., situada no Concello de Curtis (Betanzos). No eido do bioetanol, Abengoa é actualmente o segundo produtor mundial, o primeiro da UE e o quinto dos EUA.


4.83/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: