Vieiros

Durante un acto electoral en Vigo con membros de colectivos sociais da cidade e a pé do candidato socialista á alcaldía, Abel Caballero, o presidente da Xunta, Emilio Pérez Touriño, aproveitou para avanzar unha das novidades para a zona nas que traballa a Consellaría de Política Territorial. Asegurou Touriño que o executivo prepara unha solución á actual saturación da entrada a Vigo pola autoestrada vía Rande.

Para afrouxar o colapso circulatorio que se produce ás portas da cidade, os técnicos da consellaría avalían tres posibilidades: a construción dunha nova ponte, o despregue dunha nova vía por riba da xa existente, ou a ampliación dos carrís actuais da ponte. A opción dunha nova ponte podería ser finalmente descartada debido ao impacto ambiental sobre a ría. Con todo, Touriño insinuou que a idea final está avanzada e asegurou que non se fará pública até despois das eleccións "para que non se nos poida acusar de electoralismo".