Edición xeral
Os gandeiros alindan vacas de cartón na rúa para protestaren polo prezo do leite
O Sindicato Labrego Galego, Unións Agrarias e Xóvenes Agricultores anuncian fortes mobilizacións se se fai efectiva unha baixada.
Un gandeiro pousado nunha das vacas
A Porta Faxeira, enfronte da Alameda compostelá, acolleu nesta mañá unha concentración na que os tres principais sindicatos do agro galego protestaron pola baixada dos prezos do leite. Dende as 12:00, representantes do SLG, de Xóvenes Agricultores e de Unións Agrarias sostiñan unha pancarta na que amosaban a diferenza con respecto a hai doce anos: se o prezo do litro aumentou para o consumidor de 75 pesetas (0,45 €) a 75 céntimos (un 66%), o prezo que se lle está a pagar aos produtores mantense igual (de 50 pesetas a 30 céntimos). Tamén estaban “acompañados” por seis vacas de cartón con lemas inscritos como “Doce anos traballando para... ?” ou “Industria, paga o xusto ou levarás un susto”.
A produción leiteira segue a ser fundamental na economía do país. Dela viven 14.000 familias, e a baixada proposta dun 4% (1,2 céntimos) o litro, podería supor perdas de 183 millóns de euros ao mes. Varias empresas néganse a pagar menos aos seus gandeiros, como é o caso de Feiraco. “O problema é que á hora de mercar, o consumidor oriéntase polo prezo, e vai escoller as marcas do supermercado”, explica Xabier Gómez Santiso, responsábel de gandería do SLG. Deste xeito, os tres sindicatos inician unha campaña de concienciación para un consumo responsábel.
Por outra banda, a Mesa do Leite reunida o 15 de marzo en Compostela acordou crear un observatorio e estabelecer a factura única, dúas ferramentas para evitaren as flutuacións e unificaren os criterios de compra e venda.
Comentarios (5)
O infinitivo flexionado do titular ("protestaren") queda tão forçado que sobra e, ainda, soa fatal. Gramaticalmente não é necessário colocá-lo ao estar o sujeito claramente identificado e sintacticamente tão perto do verbo.
Por outra banda, dizer que acho impresentáveis declarações da FENIL (patronal leiteira espanhola) que aparecem na imprensa de hoje, onde se assegura que ainda é necessário descer os preços médios do leite em 9% para igualar-se com países como a Alemanha (onde preço médio é 31 cêntimos/litro), e lembram que o preço médio espanhol é de 31 cêntimos. Será na Espanha, porque na Galiza o preço médio é de 28/29 cts/litro.
O infinitivo conxugado está empregado correctamente. Pode que en Portugal se diga doutro xeito, mais aquí na Galiza falamos (e escribimos) así.
Xúrovos que eu compro Feiraco e non me oriento só polo prezo. Gústame que abra fácil. Con rosquiña como Feiraco. Alégrame saber que ademais teñen "bo leite" e non "malo leite" como moitas outras.
Muuuuuuuuuu...itas grazas a Feiraco. Noraboa.
Novo comentario
Se xa tes o teu nome en Vieiros, podes acceder dende aquí:
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto