Vieiros

Miles de anuncios na televisión, carteis nas escolas e programas de educación por un valor total de mil millóns de dólares. Estas eran as bazas do plan da administración Bush para promover a abstinencia sexual entre os adolescentes americanos. Un obxectivo que fracasou, segundo revela un estudo encargado polo Congreso dos Estados Unidos.

A enquisa entre máis de dous mil mozos mostra que os rapaces que participaron no plan foden cos seus compañeiros tan a miúdo como os que recibiron a educación sexual habitual. O plan da administración apostaba pola abstinencia no lugar de informar aos mozos dos métodos anticonceptivos.

Para avaliar os resultados os investigadores entrevistaron a mozos de 16 anos. Nos dous grupos -os que participaron no programa e os que non- a proporción dos que tiveran sexo no último ano era a mesma: un 23 por cento. É máis, un cuarto dos entrevistados deitárase con tres ou máis compañeiros, segundo indica a cabeceira inglesa The Guardian.

Un 20% a pelo
Máis do 20% do total de mozos recoñeceu ter mantido relacións sexuais sen preservativo, aínda que a porcentaxe que nunca usara o condón era só do 4%.

O programa gobernamental dos EE. UU. defende que a abstinencia é o mellor xeito de evitar abortos e enfermidades sexuais. Nos últimos anos, o orzamento a favor destes programas disparouse de dez millóns de dólares ao ano ata máis de 170, di a BBC.