Vieiros

As reaccións provocadas tras o accidente ferroviario que se produciu esta terza no paso a nivel de Valga foron case inmediatas. Dende as filas do Bloque Nacionalista Galego (BNG) no Congreso dos Deputados de Madrid xa se solicitou a comparecencia do presidente do Adif, para que informe das causas do sinistro no que morreron tres traballadores da construción, logo de que o coche no que viaxaban fose arroiado polo tren que cubría a liña Vigo-A Coruña.

Ademais, o goberno español recibirá unha pregunta por escrito onde o grupo nacionalista lle cuestiona sobre se vai abrir unha investigación "para esclarecer os motivos de tan tráxico suceso".

Proceso de eliminación de pasos a nivel
O BNG en Madrid quere saber tamén polo grao de seguridade deste sistema automático con barreiras, e que previsións se manexan respecto á supresión deste paso a nivel.

Ademais, esíxenlle ao alto responsábel do Adif que explique en que estado está o proceso de supresión deste tipo de pasos no territorio galego e o seu calendario de eliminación, detallado por lugares.

Reaccións do PP
Por outra banda, o deputado do Partido Popular en Madrid Celso Valga tamén solicitou a comparecencia da ministra española de Fomento, nos mesmos termos.