Unha campaña en Compostela promoverá a transmisión familiar da lingua
A Concellería de Política Lingüística de Santiago de Compostela presentou unha proposta para incentivar o uso do galego nas familias, ademais de outra para unificaren os criterios lingüísticos de uso no Concello.
Cartel da campaña
O concelleiro Manuel Portas presentou unha campaña que terá como obxectivo difundir o emprego do idioma nas familias, para evitar a ruptura da cadea de transmisión xeracional que foi a tendencia dos últimos anos, coa consecuente perda de falantes. A campaña abrangue dende a etapa do embarazo até que o nome do novo cidadán ou cidadá é inscrito no Rexistro Civil. Trátase de sensibilizar aos pais sobre as vantaxes de que os seus fillos teñan competencia lingüística en galego, e a importancia de instalárense na lingua de forma temperá, mesmo como porta de acceso a outros idiomas.
A primeira etapa, baixo o lema "Son un bebé galego", coincide co período do embarazo, e quere concienciar aos futuros pais e nais. Distribuiranse 10.000 folletos en clínicas xinecolóxicas, matronas, ou tendas de roupa e material para bebés. Nesta iniciativa colabora a Área Sanitaria de Atención Primaria de Santiago. Despois, xa pensando no momento do parto, a campaña leva a mensaxe "Fálame, fáloche", e consiste na difusión dunha carpeta informativa que inclúe un babeiro con palabras usuais nos primeiros meses de vida. Por último, co lema "Son un cidadán/á galego/a", desenvolverase unha campaña "recordatoria" da necesidade de galeguización dos nomes, coa distribución de 1.000 bonecos de peluche entre os pais e nais cando acudan ao Rexistro Civil.
Tamén para o persoal municipal
Presentouse tamén outra campaña dirixida a implicar directamente ao persoal do Concello no proceso normalizador e mellorar a súa competencia lingüística. Sistematizar o servizo interno de asesoramento lingüístico, unificar os modelos de documentos e elaborar indicacións claras de estilo e corrección lingüística, ademais de actualizar os coñecementos normativos, consonte aos cambios do 2003, son os obxectivos principais. Editáronse xa 2.000 exemplares dun Libro de Estilo, onde se recollen criterios lingüísticos, informativos, de presentación, un repertorio de documentos habituais, aspectos comunicativos, formais, etc. O libro será difundido entre os traballadores e traballadoras do municipio, e os contidos fixaranse por medio dun curso, distribuído en dúas quendas: unha os días 10, 11 e 16 de maio, e outra do 21 ao 23 de maio.
Comentarios (1)
MÁIS DO MESMO! Sería útil que en vez de insistir con campañas sectoriais: embarazo,0-3,3-6,infantil...pais, avós, tíos,...familia, escola, traballo,... Se tivese claro que verbo do idioma TAMÉN existe un réxime xurídico (Constitución, Estatuto, convenios e tratados internacionais...) que atribúe dereitos e establece obrigas de coñecemento e uso da lingua galega. É imprescindíbel sacar a problemática do galegoexterminio actual da voluntariedade, do cadaquén escolle de entre as oficiais a lingua que quere, e levalo ó lugar que nun estado democrático de dereito lle corresponde.
A CE di que as linguas españolas son patrimonio cultural obxecto de especial respecto e protección, e tal patrimonio nin se respecta nin protexe se non se aprende e usa a lingua galega.
Tamén prohibe a CE toda discriminación por razóns persoais e sociais, e isto implica poder usar na Galiza a súa lingua territorial propia coma en "Castela" se usa a súa, sen prexuízo de usarmos linguas alleas, como se fai en "Castela", con quen por falta de arraigo na Galiza descoñeza a lingua propia do territorio.
Mentres non se asuma que os dereitos e obrigas verbo do galego deben ser respectados e cumpridas coma o resto do ordenamento xurídico seguiremos co galegoexterminio....e coas campañas sectoriais galegoexterminadoras (inconscientemente galegoexterminadoras!).
Novo comentario
Se xa tes o teu nome en Vieiros, podes acceder dende aquí:
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto