Vieiros

Aproveitando esta reunión, o colectivo presentará un renovado argumentario para o novo escenario político brasileiro baixo o título "A reforma agraria necesaria: por un proxecto popular para a agricultura brasileira". O MST subliña que as iniciativas presentadas forman parte dun proxecto global para a solución dun problema que non lle afecta en exclusiva aos integrantes desta mobilización, senón a toda a sociedade.

Deste xeito, achegan ideas concretas para mudar a organización dos espazos agrarios do Brasil, e apostan por obxectivos máis amplos que a simple democratización da propiedade da terra. Así, convidan a apostar por fixar poboación no rural e despregars modelos de produción diferentes, a reorganización cara ao abastecemento do mercado interno e modelos económicos que garantan unha maior redistribución das rendas.

Nos días previos a este congreso, o Movimento dos Trabalhadores Rurais Sem Terra realizou varias accións significativas, incluída a ocupación da Fazenda Amazônia, un área de máis de catro mil hectáreas no estado do Maranhão. Un total de 270 familias participaron na acción. Na mesma rexión son xa arredor de catro milleiros de familias integradas en 23 asentamentos.