Vieiros

PSdeG e Esquerda Unida chegaron este martes ao punto de encontro final sobre o deseño do novo goberno local ferrolán. Así e todo, informaron que o plan para o reparto competencial foi elaborado para dous escenarios posíbeis, un deles para a coalición exclusiva das dúas formacións e outro deseño contemplando a integración do BNG no acordo de goberno.

O líder do BNG en Ferrol, Xoán Xosé Pita, que en días pasados xa mantivo contactos coas outras dúas formacións, foi informado xa das áreas que ao fío desas negociacións entre as tres forzas, lle corresponderían ao Bloque no posíbel tripartito. A asemblea local dos nacionalistas este próximo xoves será clave para decidir sobre a integración do BNG no goberno. Á espera desa decisión, socialistas e Esquerda Unida convocaron aos medios para o próximo venres, día anterior á constitución formal das novas corporacións municipais, para informar dos detalles do novo goberno local.