Vieiros

O BNG rexeitou este sábado a alcaldía do Carballiño, xa que se abstivo na votación logo de recibir o apoio do PPdeG. Deste xeito, o candidato do PSdeG, Carlos Montes, foi elixido alcalde e gobernará en minoría no feudo do conselleiro de Medio Ambiente, Manuel Vázquez.

Na sesión plenaria do mediodía, tomaron posesión os novos edís da corporación: 8 membros do PSdeG -a un da maioría absoluta-, 5 edís do PPdeG e 4 do BNG.

Votación de tres candidatos
Tras a toma de posesión, procedeuse á votación sobre os tres candidatos presentados á elección de alcalde. En primeiro lugar, o socialista Carlos Montes, obtivo os oito votos do seu partido fronte ao voto en contra dos populares e a abstención do BNG.

Posteriormente, procedeuse á votación do candidato popular, Arximiro Marnotes, quen recibiu as cinco papeletas do seu partido fronte ao voto en contra do PSdeG e a abstención do BNG.

E chegou o momento decisivo coa votación do candidato do BNG, Manuel Amil. Neste caso, os socialistas votaron en contra e o PPdeG deulle o seu apoio, mais os concelleiros do BNG decidiron absterse e rexeitar así a alcaldía.