Vieiros

A última hora do martes había mesmo dúbidas sobre a realización da reunión convocada para primeira hora deste mércores. As últimas declaracións ao respecto das respectivas propostas tanto por parte de socialistas como de nacionalistas agoiraban complicado o acordo de goberno en Lugo.


Logo dunha extensa reunión que comezou ás dez da mañá, PSdeG e BNG achegaron posicións. Para poñer máis preto o acordo, os nacionalistas concederon a posibilidade de que non exista unha tenencia de alcaldía única, malia que o acordo marco entre as dúas formacións así o fixaba e esa foi a fórmula adoptada nas outras cidades. Á beira, o BNG subliña que o PSdeG debera retirar os atrancos deseñados para, segundo denuncia o Bloque, baleirar de contido as áreas que xestionaría o BNG.

No ámbito do programa de goberno as posicións parecen máis factíbeis de aproximarse, se ben o Plan Xeral de Ordenación Municipal aparece como un obstáculo importante, logo de ser punto de enfrontamento reiterado no anterior treito municipal con maioría absoluta dos socialistas. No que lle toca ao modelo de organización e distribución de áreas PSdeG e BNG manteñen posturas máis diverxentes. A tenencia de alcaldía é un dos factores que impiden o acordo, xa que o Bloque insiste en que só haxa unha, seguindo o modelo de Santiago, e a última proposta dos socialistas non acepta este punto.