A Secretaria Xeral de Política Lingüistica, Marisol López, anunciou a convocatoria dos novos exames de lingua, estruturados en cinco niveis.
No último trimestre deste ano van botar a andar as probas para a a obtención do Certificado de Lingua Galega (Celga). Estas probas, que están divididas en cinco niveis, substitúen os actuais certificados de Iniciación e Perfeccionamento.
A Secretaria Xeral de Política Lingüística, Marisol López, sinalou este luns que “nesta nova etapa de ensino e certificación da lingua galega quérese establecer o ensino do galego desde un enfoque comunicativo, mediante tarefas, que permitan que os candidatos demostren as súas habilidades no uso da lingua, e non só no coñecemento do código que teñen do galego”.
Para a preparación do Celga, estanse elaborando materiais destinados á aprendizaxe. Os textos van poder descargarse en breve na páxina electrónica de Política Lingüística. Tamén haberá opción de asistir a cursos preparatorios do nivel ao que se aspire. A obtención do certificado está vinculada á superación do exame. A partir de 2008 estabeleceranse dúas convocatorias anuais de exames.