Vieiros

Eberhard von Gemminger, director da programación alemá da Radio Vaticana, e no seu momento o primeiro xornalista en entrevistar o actual Papa, Bieito XVI, considera que a xerarquía católica podería dar este paso antes mesmo de admitir que as mulleres sexan ordenadas como cregos. "Moitos laicos obtiveron a púrpura cardealicia, e xa que logo, por que non poderiamos pensar en que haxa mulleres cardeais no futuro?", comentou o xesuíta durante a entrevista concedida ao xornal Il Messaggero.

"Soño con que no futuro o Papa poida escollelo un grupo de homes e mulleres", indicou en referencia aos cónclaves vaticanos que reúnen 120 cardeais menores de 80 anos. "Non é discurso feminista", expresou, "trátase só de realismo e xustiza". "Por suposto, hoxe en día non é factíbel, pero quen sabe dentro de cen anos", recoñeceu. Citando nomes de prestixiosas mulleres vencelladas á Igrexa, coma os de Chiara Lubich e Teresa de Calcuta, Gemminger pregúntase "por que mulleres desa categoría non poden formar parte do colexio cardenalicio?".

Na súa opinión, un primeiro paso podería ser que os "Consellos Pontificios" gañasen en pluralidade incluíndo máis mulleres. Estes órganos están integrados por segrares e laicos e creáronse para o debate e proposta de accións concretas sobre diversos temas de doutrina e organización da Igrexa Católica