Vieiros

Un día despois de que o Día de Galiza levase de novo aos discursos políticos a necesidade dun novo Estatuto para Galiza, Emilio Pérez Touriño reiterou a súa confianza en que a reforma se poida acometer "máis axiña que tarde" pero dixo dubidar de que o PP vaia favorecer o proceso. O presidente da Xunta comentou que agarda que despois das próximas eleccións xerais se dea un apoio significativo nas urnas "ás forzas galeguistas que apoian a revisión estatutaria". Touriño subliñou que non se abrirá de novo un proceso que "conduza como anuncio ao fracaso da reforma". "Galiza xa viviu esta situación por un partido que impuxo o seu veto", laiouse. Así, asegurou que non meterá Galiza "nun camiño sen saída por unha lea política".

Na mesma xornada, o secretario xeral do PPdeG, Afonso Rueda, aseguraba que o seu partido podería retomar as negociacións sobre a reforma estatutaria se o presidente da Xunta, Emilio Pérez Touriño, "dá ese paso" e "invita" os populares a sentar a dialogar. "Nós xa nos manifestamos a favor diso. É Touriño quen dixo que volver falar disto é marear a perdiz", asegurou Rueda. Lembrou que despois do fracaso das negociacións entre os tres grupos a comezos de ano acordouse esperar ata despois das municipais para abordar a reforma. "Xa pasaron as eleccións e nós estamos dispostos a tratar este asunto", insistiu.

Por outra parte, o vicepresidente da Xunta, Anxo Quintana, reiterou o seu desexo de poñer en marcha as negociacións para a creación do Estatuto, pero salientou que o problema é o PP. Lamentou Quintana que a posición do PPdeG sobre o asunto sexa unha decisión que "non se vai tomar en Galiza, senón en Madrid". "O PPdeG non ten autoridade abondo para definir unha estratexia propia que lles permita falar para facer un Estatuto de todos e de primeira", reprochoulles. Quintana advertiulles aos populares de que os cidadáns "están fartos de que a dirección do PP en Madrid condene continuamente a Galiza a ser un país de segunda, a intentar romper todas as nosas oportunidades e a desfacer os soños de miles de galegos", acusou.