Vieiros

Vieiros de meu Perfil


Edición xeral

RSS de Edición xeral
Con diversos actos en Ferrol

A UPG conmemora o 32º aniversario do asasinato de Moncho Reboiras

Xosé Ramón Reboiras Noia, sindicalista e membro do partido, foi abatido a tiros pola policía franquista no portal número 27 da rúa da Terra.

Redacción - 11:00 11/08/2007
Logo da UPG

Logo da UPG

A Unión do Povo Galego (UPG) organiza esta fin de semana unha serie de actos con motivo do 32º aniversario do asasinato do sindicalista e membro deste partido, Xosé Ramón Reboiras Noia, en Ferrol no ano 1975.

Este sábado 11 de agosto, ás 20.30 horas, o presidente da UPG, Bautista Álvarez, impartirá a conferencia Xosé Ramón Reboiras e o nacionalismo galego na década dos setenta no local social do Montiño, en Imo, parroquia natal do homenaxeado, no municipio de Dodro (O Sar), seguida dunha ofrenda floral no cemiterio da mesma parroquia, onde está enterrado.

Actos do domingo

Xa o domingo, a UPG organiza unha comida popular na localidade ferrolá de San Sadurniño, onde intervirá Francisco Xosé Rei, membro do Comité Nacional da Unión da Mocidade Galega (UMG) -organización xuvenil da UPG, que este ano cumpre 30 anos desde a súa constitución en agosto de 1977-, e o alcalde do municipio, Secundino García Casal. Posteriormente haberá un roteiro cultural polo Castelo de Naraío.

Máis tarde, ás 19.15, terá lugar na Praza de Armas (diante da Casa Consistorial) unha concentración que partirá en dirección ao portal 27 da Rúa dá Terra, onde Reboiras foi abatido a tiros pola policía franquista, para realizar outra ofrenda floral e cantar a Internacional.

Por último, ás 19.30, un acto político que contará coas intervencións da responsábel de Organización no consello Local do BNG de Ferrol, Ana Vérez; o director xeral de Xuventude e Solidariedade do Goberno, Rubén Cela; e o secretario xeral da UPG, Francisco Rodríguez, pechará o programa de actos. Finalmente, e tras interpretación do Himno Nacional, o músico Xabier Díaz realizará unha actuación para presentar o seu novo disco, Coplas para Icía.


Documentos

Ligazóns

4.38/5 (13 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: