Vieiros

Vieiros de meu Perfil


Edición xeral

RSS de Edición xeral
Responsabilizan a forzas gobernamentais, islamitas e exército etíope

"Silencio vergoñento" sobre os crimes de guerra en Somalia

Human Rights Watch denuncia que os residentes da capital de Somalia foron albo no último ano de numerosos crimes de guerra ante a pasividade da comunidade internacional.

Redacción - 12:00 14/08/2007
Mogadiscio / Foto: Eligio Paoni en Contrasto.it

Mogadiscio / Foto: Eligio Paoni en Contrasto.it

"As forzas etíopes, somalís e os rebeldes son todos responsábeis das violacións graves e sistemáticas das leis da guerra" e por "innumerábeis crimes de guerra", conclúe o relatorio divulgado na terza feira pola organización de defensa dos dereitos humanos HRW. O comunicado, publicado en Nairobi, aínda segue: "todas as partes en conflito demostran unha indiferenza total en relación ao benestar dos civís".

A capital de Somalia, unha das cidades máis perigosas de África
Somalia está en guerra civil dende 1991 na capital, Mogadiscio, que foi privada naquela altura de un goberno central, é considerada unha das cidades máis perigosas de África. A situación agravouse dende primeiros deste ano, cando o exército etíope entrou no país en auxilio do débil goberno de transición, acosado polas milicias islámicas que o verán pasado tiñan tomado a capital.

En pouco tempo o exército etíope tomou o poder, e controlando case todo o territorio instalou un executivo propio na capital, apoiado pola ONU. Mais os ataques das milicias islámicas, que aínda teñen combatentes na capital, son diarios e afectan, sobre todo, á poboación civil.

O exército etíope, un dos principais culpábeis
As maiores atrocidades denunciadas no informe de HRW impútanselle ao exército etíope, que é acusado de ter bombardeado "durante longo tempo e sen discernimento" zonas residenciais, no asalto que os levou a tomar o control da capital, despois de que participasen na execución de civís, tomando edificios públicos coma os hospitais.

Os rebeldes tamén son acusados neste informe de poñer en risco a seguridade dos civís, ao se refuxiar en zonas residenciais, mais tamén son acusados de asasinar civís e funcionariado do goberno central.Ao contrario da versión oficial, o nivel de violencia non parou

Segundo este informe, as loitas rexistradas entre marzo e abril provocaron "entre 400 a 1300 mortos", ante o "silencio vergoñento" dos principais gobernos internacionais, ademais do Consello de Seguridade da ONU.


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: