Vieiros

Na súa comparecencia, o deputado explicou que a adxudicación das obras a "unhas poucas empresas" incitaba a sospeitar un "procedemento pouco transparente e con certo nesgo". Lembrou que a Fundación xa ten adquiridos compromisos plurianuais con certas empresas para a construción das obras máis importantes, agás unha.

"Non se cuestiona a calidade da obra nin a altura creativa do arquitecto Peter Eisenmann, nin a profesionalidade dos técnicos e os traballadores do proxecto; pero o que si se cuestiona é o modelo de planificación e xestión, e a súa relación co Parlamento", afirmou.

Incapacidade do goberno anterior

Salientou tamén que as comparecencias perante a Comisión dos membros do PPdG non serviron para xustificar as actuacións do seu goberno nesta materia durante os anos 1998-2005. Para Leiceaga, o xestor público foi "pouco vixiante e incapaz de controlar a pulsión creativa de Peter Eisenmann". Tamén apunta á incapacidade do anterior executivo para calcular o impacto económico do complexo do Gaiás e súa incidencia sobre a industria cultural en xeral, e a audiovisual en particular.

"Todos os elementos que poderían servir para crear unha proposta máis sólida están ausentes para a anterior Xunta", indicou. O desfase orzamentario de máis de 200 millóns de euros atribuíullo á "falta de control económico e á laxitude no seguimento das obras, as subministracións, os contratos".