Vieiros

O proxecto de Lei de Arquivos de Galiza presentarase en 2008, segundo anunciou a conselleira de Cultura e Deporte, Ánxela Bugallo. O seu departamento xa está a preparar o texto para o seu futuro debate no Parlamento.

A nova norma contempla a creación do Arquivo Nacional, que comezará a funcionar en 2009. A entidade converterase no corazón do sistema de arquivos do país. Como Arquivo Xeral da Administración terá vocación de servizo aos cidadáns e ás administracións, dirixirá os arquivos da Xunta e coordinará o conxunto dos arquivos galegos para que cumpran coa súa función, e como arquivo histórico servirá para recuperar, preservar e poñer en valor o noso patrimonio documental.

Neste sentido, Bugallo reclamou a transferencia da titularidade dos arquivos que seguen a depender do Estado Español, como os histórico-provinciais de Lugo, Ourense e Pontevedra e mais o do Reino de Galiza.

Así mesmo, a lei prevé artellar o Sistema de Arquivos de Galiza, a súa modernización e a posta en valor do noso patrimonio documental, ademais de adaptar o plano legal dos arquivos á Sociedade da Información.

Segundo explicou Bugallo, a lei desenvolverá de forma completa as competencias do Estatuto de Autonomía e cubrirá un baleiro, dado que case todo o Estado Español conta coa súa Lei de Arquivos.