Vieiros

O Banco de Terras bota a andar e os ingleses, amigos de disfrutar das súas xubilacións en latitudes máis meridionais ca illa da Gran Bretaña, xa andan a 'bruxulear' en que consiste o bloody Bantegal.

A revista Home Worldwide, especializada no sector inmobiliario e de viaxes, da editorial con sede en Bath (Inglaterra) Merricks, analiza esta semana para os seus lectores as principais características do novo plan da Consellaría de Medio Rural.

"A provincia celta de España, Galiza, é un dos principais territorios en produción leiteira grazas a súa abundancia en pastos. Porén, moitas explotacións non poden medrar debido a escaseza de terras á venda ou en alugueiro", afirman na publicación.

"Achegamento á comunidade"
"Agora, o goberno rexional de Galiza pon en marcha un 'banco de terras', que lles permitirá aos labregos o alugueiro de leiras, coa garantía do goberno de que serán devoltas aos seus propietarios en perfectas condicións".

Ademais, salienta "a moderna tecnoloxía" empregada no desenvolvemento do plan, cunha web -"só en Gallego language polo de agora"-, que posibilita buscar os predios máis convintes introducindo diferentes criterios.

A revista aconsella aos seus lectores que vaian adquirir unha propiedade na zona rural do noso país que se posúen un anaco de terra que non vaian labrar o poñan no Bantegal, "para que un labrego local se poida beneficiar", e ademais facilite o "achegamento á comunidade" do foráneo. Ou ben , aproveitar o baixo custe de alugar terras que, segundo din, "permitirá facer asumíbel o teu soño".