Vieiros

Vieiros de meu Perfil


Canal Verde

Xestionado pola Federación Ecoloxista Galega e Vieiros
RSS de Canal Verde
Novo apoio á iniciativa do Concello de Vigo

Aforro no alumeado público: no Nadal e todo o ano!

Continuando coa campaña "POR UN NADAL MAIS ECOLÓXICO" ADEGA chama a atención sobre o desbaldimento de enerxía que supoñen moitos alumeados festivos, particularmente nestas datas. Recomendamos aos concellos non só coidar o tipo de luminarias (de baixo consumo ou tipo LED), senón tamén establecer datas e horarios máis restritivos. Neste senso van as iniciativas de concellos como o de Vigo, que deberían tamén extenderse ao resto do ano: un alumeado público ineficiente é unha das principais causas do afogo económico dos concellos, contribúe ao cambio climático e causa contaminación lumínica.
Contaminación lumínica da península.( 1997 www.pamplonetario.org)
 

ADEGA - 11:19 13/12/2007
Tags:

O Concello de Vigo vai inaugurar o 12-D o seu alumeado público (no 2006 foi o 30 de novembro), convertíndose na cidade galega que vai aplicar un horario máis restritivo para conquerir o máximo aforro, que pode chegar ao 60%. En Vigo, o alumeado ornamental permanecerá aceso até o 6 de xaneiro, reducíndose ademais o número de horas de funcionamento. As luces de Nadal acenderanse ao mesmo tempo que o alumeado público, pero en lugar de apagarse ás 03.00 horas farano ás 23.00, de luns a venres, e ás 24.00 os sábados, domingos e festivos.
  (Previsión para o 2020 www.pamplonetario.org)


ADEGA apoia esta medida e felicita ao concello de Vigo pola súa sensibilidade e compromiso ambiental, mais lembra que as medidas de aforro enerxético, quer no alumeado público, deberían extenderse ao resto do ano.

Un alumeado público ineficiente, alén de desbaldir até o 50% da enerxía que consume e contribuir ao aumento de emisións de gases de efeito invernadoiro, é tamén unha das principais causas de endebedamento de moitos concellos que ven como a factura eléctrica non para de medrar. A optimización dos sistemas de alumeado, adatando as luminarias en canto a tipo (millor as de sodio que as de mercurio), colocación e orientación, e optimizando os horarios, pode aforrar até un 60% do gasto eléctrico, reducindo tamén a contaminación lumínica. Este tipo de contaminación, ao igual que a acústica, está asociada ao mal uso de dispositivos -neste caso de iluminación- e é causa de alteracións ambientais e mesmo problemas de saúde, alén de impedir a contemplación e a investigación do ceo nocturno.

Neste senso, ADEGA demanda das administracións a aplicacións de planos de aforro e eficiencia tendentes a reducir o despilfarro enerxético nos concellos, máis aló de medidas puntuais. Estes planos deben ir orientadas, por unha banda a incrementar a eficiencia no consumo de enerxía (optimizando por exemplo os sistemas de iluminación) e por outra á introducción das enerxías renovábeis nos edificios e instalacións públicas. Paralelamente, son precisas campañas de concienciación cidadá para que a povoación se decate da importancia de que iluminar ben non pasa por gastar máis enerxía nen poñer máis farolas, senón por aproveitar millor a luz que emitimos.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: