Vieiros

Con todas as enquisas en contra, Hillary Clinton gañou as primarias demócratas (tamén coñecidas como caucus) no estado de New Hampshire, nas que foi elixido do lado republicano John McCain, quen regresa con forza á carreira presidencial que tivo que abandonar no 2000.

A vitoria da senadora sorprendeu mesmo aos membros das súas propias filas, dado que as sondaxes previas afirmaban unha contundente vitoria do senador de Illinois, Barack Obama, gañador dos caucus de Iowa a semana pasada (onde as enquisas daban gañadora a Hillary).

Mais a ex primeira dama logrou reverter esta tendencia de voto, axudada pola imaxe, moito máis humana e cálida, que deu nunha pequena reunión con amas de casa unhas horas antes da apertura dos colexios electorais.

Ao final, Hillary Clinton fíxose co 39% dos votos de New Hampshire, seguida de Barack Obama co 36%, e o ex senador John Edwards, cun 17% dos votos.

Pola súa banda, o senador Barack Obama felicitou ao seu rival demócrata pola vitoria. No entanto, prometeu que continuará con maior forza a súa loita pola candidatura presidencial.

No lado republicano, o veterano senador republicano John McCainun -un ex prisioneiro de guerra que é partidario do mantemento das tropas en Iraq- alzouse coa vitoria, co que se coloca no pelotón de cabeza da carreira electoral.