Vieiros

Se as cousas seguen para adiante, comentoulle a Vieiros Renato Núñez, voceiro do Movemento polos Dereitos Civís (MpDC), "é posíbel que abran unha investigación e que xunten a nosa denuncia ás outras que hai interpostas polos veciños e varias particulares; daquela, se todo segue o seu curso, chamarían a declarar a Abel Caballero".

No caso de que as cousas non fosen así, Núñez lembrou que dende o MpDC teñen pensado presentarse como acusación particular, "pasar da Fiscalía e reclamar para que chamen a Caballero".

"Vulnerou os dereitos dos seus veciños" ao non deixarlles asistir ao pleno
Para a organización, é o alcalde vigués quen ten que responder ante a xustiza por "vulnerar os dereitos dos seus veciños", ao non deixarlles acceder ao pleno no que se debatían as mudanzas do PXOM, o pasado 29 de decembro.

O MpDC presentou, naquela altura, unha denuncia contra Caballero, por lles non deixar entrar na Casa Consistorial "a un grupo de cidadáns que pretendían asistir ao pleno"; xente de varias asociacións de veciños que tamén presentaron as súas propias denuncias contra Caballero, ao ver como se conculcaba o seu dereito de participación, "mentres que un 'selecto' grupo de persoas, elixido polo propio alcalde, entraba no edificio por unha porta lateral sen atopar dificultades".

Por todo isto, segundo contan dende o MpDC, o alcalde vigués podería afrontar a inhabilitación no seu cargo.