Vieiros

Membros da campaña BBVA Sen Armas participaron na xunta de accionistas do banco para denunciar que parte dos beneficios do BBVA veñen da industria das armas, proxectos contaminantes e iniciativas que violan os dereitos humanos.

Os membros do Centre de Justícia i Pau, Alejandro Pozo e Jordi Calvo, e Victor Maeso, membro de Setem, foron os encargados de denunciar ante o presidente do BBVA, Francisco González, e os centos de accionistas presentes no palacio de congresos de Bilbao Euskalduna, as incoherencias en materia de compromiso social que mantén o banco.

En concreto, os membros da campaña BBVA Sen Armas denunciaron que o BBVA financia a fabricación de bombas de acio, armas que polo seu funcionamento non poden distinguir entre persoas combatentes e civís. Dentro do mesmo campo, os oradores acusaron ao banco de financiar e investir na industria militar, a través de participacións accionariais directas ou indirectas en empresas do sector armamentístico español como Ibérica do Espazo, Hisdesat, Indra, Rymsa e Inmize.

Victor Maeso, pola súa banda, fixo fincapé no financiamento, por parte do BBVA, de proxectos contaminantes e que violan os dereitos humanos, como é o caso de Tecpetrol, empresa que promove a ampliación do proxecto de construción do gasoduto Camisea, situado na Cuenca do baixo Urubamba (Perú). BBVA Sen Armas explica que desde o seu inicio en 2004, este proxecto recibiu "duras críticas" por destruír o hábitat de comunidades indíxenas e "incumprir normas estatais e internacionais de dereitos humanos".

Na súa intervención, o presidente do BBVA, Francisco González, deulle a razón ás intervencións de Justícia i Pau e de Setem, afirmando que a política do banco é a de reducir os seus investimentos en armamento, malia que supeditou ese paso a que o "resto de entidades financeiras tomen posicións similares". Actualmente, o BBVA ten en marcha un programa de responsabilidade social corporativa a través da súa fundación.

BBVA sen armas é unha campaña de sensibilización e denuncia das entidades financeiras que participan en industrias militares ou que alteran gravemente a vida de comunidades e pobos, mediante a esixencia de respecto dos dereitos humanos e o medio ambiente, por parte das entidades bancarias e a Corporación BBVA en particular. Os seus promotores son o Centre Delàs de estudos para a paz, o Observatorio da Débeda na Globalización e Setem Catalunya.