Vieiros

O proxecto "residencial" Monte Maela, en Fisterra, que inclúe até 52 vivendas, e As Alboradas, unha iniciativa en pleno centro da vila de Cee con ducias de vivendas e locais comerciais, son os principais proxectos do Grupo Lábaro en Galiza, e mesmo contan con cadansúa web na rede para a venda dos inmobles. Alén deses proxectos este grupo empresarial desembarcara con forza en Galiza, e fixérase con amplas extensións de terreos na Costa da Morte, onde tiña en proxecto diversas posibilidades de urbanizacións perto da costa que a medio prazo implicaba a construción de arredor dun milleiro de vivendas.

Empresas que estoupan coa burbulla
En paralelo á cadea de problemas no sector, o Grupo Lábaro acaba de anunciar "concurso de acredores", solicitude presentada nun xulgado mercantil madrileño, e mecanismo necesario ao non poder facerlle fronte ás débedas. A empresa argumenta "falta de liquidez" e atribúelle a situación á "crise que lle afecta ao sector inmobiliario desde o segundo semestre de 2007".

Con algo máis de vinte anos de traxectoria no sector da promoción inmobiliaria, o Grupo Lábaro medrara espectacularmente nos últimos tempos, chegando a facerse en datas recentes co 12% de Parquesol, mercado ao Grupo San José en decembro pasado, e converténdoa no terceiro accionista da compañía. Naquela altura, desde o contorno das empresas mesmo se recoñecía a posibilidade de que Lábaro entrara no proceso de fusión entre San José e Parquesol.