Vieiros

Vieiros de meu Perfil


Edición xeral

RSS de Edición xeral
Programa 'Rodela'

As mulleres vítimas da violencia doméstica, un pouco menos soas

Un total de sesenta voluntarios acompañaranas para lles dar apoio á hora de acceder a diversos recursos sociais en cinco cidades do país.

Redacción - 19:40 02/06/2008

Un total de 60 voluntarios de Ferrol, Lugo, Vigo, Ourense e A Coruña acompañan dende este luns a mulleres vítimas de violencia de xénero co fin de apoialas á hora de acceder aos diversos recursos sociais de que dispoñen, tal como solicitar un parte de lesións, acudir a un xuízo ou pedir unha praza nun centro de acollida.

Estas serán algunhas das funcións do voluntariado dirixido ás mulleres vítimas de violencia de xénero que recolle o programa Rodela, impulsado pola Vicepresidencia da Xunta, e que presentaron este luns Anxo Quintana e a directora xeral do Servizo de Igualdade, Ana Luísa Bouza.

Este proxecto sitúa a Galiza como "referente en impulsar, financiar e coordinar" unha rede social deste tipo, sinalou o vicepresidente, que reivindicou ademais que o programa ha servir para "canalizar" a violencia de xénero e integrala nun espazo cedido ao tecido asociativo. "É un sistema innovador" que non existe no Estado, sentenciou.

Petición a través da web
No entanto, Quintana precisou que se trata dun sistema "complementario" de loita contra a violencia de xénero e asumiu que as administracións deben atender ás súas responsabilidades e non traspasalas á cidadanía. Ademais, dixo que agardaba que Rodela se estendese a máis cidades do país.

Todas as mulleres poderán realizar a súa petición a través da web do programa (www.rodela.eu), que entrará en funcionamento esta quinta feira, e que servirá para xestionar as demandas en función da cidade onde estas residan, indicou Ana Luísa Bouza.


4.2/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: