Vieiros

Vieiros de meu Perfil


Bos Aires

Edición xestionada por Débora Campos
RSS de Bos Aires
Logo da exhumación de 600 corpos

Chega a Galiza o equipo que trata de identificar os "desaparecidos forzosos" na ditadura arxentina

Haberá unha recollida masiva de mostras de sangue de parentes de persoas detidas e desaparecidas naqueles anos.

Redacción - 16:30 13/06/2008

"Se ten vostede un familiar vítima da desaparición forzada entre 1974 e 1983 na Arxentina, unha simple gota do seu sangue pode axudar a identificalo". Así se presenta o proxecto que a próxima semana trae a Galiza un grupo de persoas do Equipo Arxentino de Antropoloxía Forense, EAAF. Os familiares son convidados a pasar polo consulado de Vigo, onde lles tomarán as mostras de sangue.

A iniciativa chega despois da exhumación de arredor de 600 esqueletos que neste momento agardan a ser identificados. Unha cifra que aumenta, xa que as exhumacións continúan en todo o país. Por este motivo, creouse en Arxentina un Banco de Mostras de Sangue, dependente da Secretaría de Dereitos Humanos da Nación. Durante 2008 e 2009, a EAAF púxose o obxectivo de convocar o maior número posíbel de parentes de desaparecidos e represaliados para comparar as mostras de sangue cos restos dos cadáveres atopados.

En Galiza, onde se pensa que é probábel atopar parentes de moitos dos desaparecidos durante a ditadura arxentina, a recollida de mostras comezará o 18 de xuño. O equipo da EAAF está encabezado por Luís Fondebrider, licenciado en Ciencias Antropolóxicas. A campaña está realizándose tamén noutras partes do Estado español, e en Galiza está coordinada polo Consulado Xeral de Arxentina, coa cónsul Georgina Bortolotto á fronte. Contará coa colaboración de especialistas galegos, como é o caso de Anxo Carracedo, catedrático de Medicina Legal da Universidade de Santiago.

Cun balance de milleiros de asasinatos producidos durante a ditadura entre os anos 1974 e 1983 e arredor de 30 mil desaparecidos, en Arxentina hai xa 65 hospitais recollendo mostras de familiares destes. Desde novembro, cando comezou a campaña, foron xa máis de dous milleiros de persoas as que deixaron mostra de sangue para ser comparado con algún dos corpos recuperados.


4.67/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: