Vieiros

Vieiros de meu Perfil


Edición xeral

RSS de Edición xeral
A un mes das Olimpíadas

Save The Children denuncia a explotación dos nenos deportistas

Nun seu informe titulado Nenos en competición, a ONG denuncia a explotación infantil que se desenvolve nos deportes de elite.

Redacción - 19:50 09/07/2008

Na presentación, esta cuarta feira, do seu informe Nenos en Competición (en pdf e en castelán), a ONG Save the Children denunciou que tres de cada dez nenos sofren graves riscos ao practicar deportes de competición. Tamén recollen que o 70 por cento dos mozos e mozas que compiten na elite resulta, en gran parte, beneficiado polo deporte, pero que o 20 por cento vive situacións perigosas, e o restante 10 por cento ve algúns dos seus dereitos violados.

Para esta ONG, a "explotación infantil" en alta competición estase estendendo, e púxose como exemplo a competición de boxeo en Tailandia, onde nenos de "só" cinco a nove anos son sometidos a "condicións terríbeis" de adestramento para iniciarse aos 12 ou 14 en combates oficiais deste deporte, que no país asiático move "enormes cantidades de diñeiro".

Os males do fútbol e da ximnasia
O informe tamén se refire aos nenos futbolistas e ximnastas. En canto ao fútbol, Save The Children alerta de que existe un tráfico de nenos futbolistas, que se captan en academias e fútbol e a través de axentes ilegais, para ir xogar dende África ou América Latina a Europa, onde, moitas veces, non atopan onde quedar, e terminan vivindo nas rúas. A ONG cifra en 600 os nenos que moran nas rúas de París, chegados dos seus a países de orixe para xogar na canteira dalgún clube importante.

Por outro lado, a ONG tamén alertou da ximnasia, que pode serrar problemas nos máis cativos, como lesións ou trastornos alimentarios, debidos aos adestramentos intensivos que poden causar importantes atrasos no crecemento das crianzas.

A recomendación coa que terminan é a de que ningún neno ou nena menor de 7 anos debera practicar un deporte de competición, e que até os 13 non se debería realizar unha práctica especializada.


4.5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: