Vieiros

"Temos como referente ao proceso Espazo Aberto dentro do BNG, e recollemos a estrutura do socialismo e do republicanismo que xa funcionaba no seo de Galiza Nova para abrirmos un período de tempo para sumar máis mozos e mozas a este proxecto en marcha", explicou Paulo Carlos López, voceiro do colectivo, durante a presentación este mércores dunha iniciativa coa que din aspirar a "atraer máis xente ao nacionalismo organizado".

Con esa fin, e baixo a plataforma provisionalmente bautizada "Un Espazo Aberto en Galiza Nova", deseñaron unha campaña cara a este 25 de xullo baixo o título "Pola Esquerda, República Galega" e que inclúe unha publicación especial que se distribuirá durante o Festigal. Segundo explicou Irene Quintela, unha das coordinadoras da revista, trátase dun espazo "enfocado á diversificación de temas e colaboradores". Entre outros, inclúese un artigo de Gerard Coca, portavoz das Joventuts d'Esquerra Republicana de Catalunya. Tamén escriben Abel López Soto, alcalde de Sada, e Charo Fernández Velho, secretaria de Acción Feminista do BNG.