Vieiros

A alcaldesa en función e concelleira de Urbanismo do Concello de Pontevedra, Teresa Casal (PSdeG), presentou esta quinta feira as estatísticas urbanísticas do primeiro semestre do ano ao tempo que dicía que o seu municipio é "alleo á crise".

Segundo Casal, "os datos son satisfactorios porque amosan que Pontevedra está capeando bastante ben a crise". A seguir dixo que isto era debido a que o modelo urbanístico da súa cidade é "realista e axustado ás necesidades do mercado, lonxe de modelos especuladores e montados na burbulla, como noutros municipios".

A crise da construción non chega a Pontevedra
Dende o 1 de xaneiro até finais de xuño, en Pontevedra concedéronse licenzas para construír 401 vivendas, unha cifra "bastante alta" para a concelleira de Urbanismo, tendo en conta a media dos últimos anos.

Baseándose neste dato e ao volume de solicitudes que están manexando, todo indica, segundo Teresa Casal, que "cara a finais de ano imos estar, con total seguridade, no contorno das mil vivendas licenciadas". Casal quixo, tamén, destacar que as 401 vivendas con licenza non están "contaminadas" polo efecto xurdido a raíz do Decreto das Normas do Hábitat Galego, que entrou en vigor en abril deste ano, e que provocou unha "auténtica avalancha", en palabras da edil pontevedresa, de peticións de licenzas.