Vieiros

Nas primeiras horas da noite deste sábado 16 vai ter lugar un eclipse parcial de lúa "de importante magnitude" segundo advirte o director do Observatorio Astronómico Ramón María Aller da USC, Xosé Anxo Docobo.

No eclipse de Lúa, debido á iluminación do Sol, a Terra proxecta tras de si un cono de sombra que, a súa vez, está envolto nun cono de penumbra. Antes de entrar na zona máis escura, a Lúa atravesará a parte penumbral e, nese intre, o satélite seguirá sendo visíbel totalmente. O eclipse sería total se entrase totalmente no espazo de sombra, pero nesta ocasión a Lúa só atravesará de xeito parcial este espazo.

Ao contrario que sucede coas eclipses de Sol, para a súa observación directa non será necesaria ningunha precaución. Se a climatoloxía acompaña, poderá seguirse con prismáticos e telescopios “sobre todo, nos momentos nos que a luz da Lúa chea non moleste”, apunta Docobo.

O feito de que a parte do disco lunar oculto pola sombra terrestre continúe á vista, con tons vermellos ou marróns, débese a que a atmosfera desvía parte da luz solar e esta incide sobre o satélite eclipsado.

O vindeiro ano poderán observarse dende a Península Ibérica, un eclipse penumbral e outro parcial de Lúa pero de escasa magnitude. No tocante aos solares, o próximo será parcial o 4 de xaneiro de 2011 e para contemplar un total haberá que agardar ata 2026.