Vieiros

As indicacións xeográficas protexidas 'Botelo de Galicia' e 'Androlla de Galicia' dan os seus primeiros pasos coa súa publicación no DOG. A Consellaría do Medio Rural prevé declarar a protección transitoria dos dous produtos, de cara á súa comercialización co distintivo de calidade a partir de 2009.

A partir de agora, hai un prazo de dous meses para a presentación de enmendas aos dous rexistros. As indicacións xeográficas protexidas ampararán os botelos e as androllas producidas na zona oriental do país a partir de carne de porco de calidade. No caso do botelo, deberá ter un mínimo do 70 por cento de carne de costela, mentres que para a androlla a esixencia aumenta até o 90 por cento de costela.

Pataca da Limia
Por outra banda, produtores e industrias asinaron este martes, na Mesa da Pataca, un contrato que regulará a compravenda de pataca da Limia e fixará un prezo base para o produto. Ao importe, que se decidirá antes do comezo da próxima campaña, en marzo, engadiranse incrementos en función da calidade. O acordo seguirá vixente até maio de 2009, cando se poderá prorrogar por tres anos máis.

O Sindicato Labrego Galego desmarcouse da decisión, por considerar que o documento constitúe un instrumento a favor dos almacenistas e non dos produtores.