Vieiros

A pista, probabélmente para servizos forestais, leva aparellada o rozado mecánico, a remoción e o subsolado profundo do sustrato e carece de estudo de impacto ambiental. Plantas endémicas coma a Santolina melidensis, a Armeria merinoi e o Leucanthemnum gallaecicum están catalogadas como "en perigo de extinción" no Catálogo Galego de Especies Ameazadas.

A zona, caracterizada pola presenza dun raro substrato serpentinítico pola alteración de rochas ultrabásicas, alberga comunidades vexetais pouco frecuentes e especies únicas. Alén das xa mencionadas, é posíbel atopar tamén outros interesantes serpentinófitos como Alyssum guitianae, Anthyllis melidensis, Asplenium adiantum-nigrum var. corunnense, Centaurea janeri subsp. gallaecica, Euphorbia exigua subsp. merinoi, Koeleria crassipes, Phleum pratensis subsp. bertolonii, Plantago serpentina, Sagina merinoi, Sedum villosum subsp. aristatum ou Thlaspi oligospermum.

As obras da pista, de até 8 m de ancho nalgúns treitos, arramplaron coa vexetación e as escavadoras mesmo provocaron o subsolado profundo, deixando os entullos e as matas secas amoreadas nas beiras e danando nalgúns casos os muretes lindeiros tradicionais, singular elemento etnográfico construido tamén a base de rochas ultrabásicas.

ADEGA lembra que estas actuacións, por estar dentro dun espazo da Rede Natura e afectar a hábitats prioritarios e especies en perigo de extinción, deben contar cun estudo de efectos ambientais previo, precisamente para garantir que non van poñer en perigo os valores naturais obxecto de protección.

Non nos opoñemos á millora das infraestruturas forestais par facilitar o combate ao lume, pero estes traballos non poden facerse de calquera xeito e rematar degradando os elementos máis valiosos do noso patrimonio natural.