Vieiros

Vieiros de meu Perfil


Edición xeral

RSS de Edición xeral
Convidado pola Deputación de Pontevedra

Insultan o cónsul de Venezuela durante os actos do 12 de outubro en Baiona

O representante venezolano foi increpado por unha persoa do público polo seu discurso no Día da Resistencia Indíxena.

Fernando Arrizado - 18:30 15/10/2008

"Estamos a recibir numerosas chamadas e correos de apoio", afirma Pedro Ugueto, vicecónsul xeral de Venezuela en Galiza que, no entanto, prefire minimizar a importancia do acontecido en Baiona esta fin de semana.

O máximo representante venezolano no noso país, David Nieves, participou nos actos organizados pola Deputación de Pontevedra na vila miñorá con motivo do 12 de outubro -Día da Hispanidade para os españois, Día da Resistencia Indíxena para os latinoamericanos-, logo de ser designado representante do corpo consular, que foi quen recibiu a invitación do ente provincial.

Á lectura do seu discurso, onde Nieves fixo un repaso polo significado real que en Latinoamérica ten ese día e polos anos de "colonización a lume e ferro" que viñeron despois, un dos asistentes do público insultouno: ¡Sinvergüenza. ¡Vete para tu país, sinvergüenza! (Lercho! Lisca para o teu país, lercho!).

O individuo, segundo comenta Ugueto, foi rapidamente "neutralizado" polos asistentes que o rodeaban. Coincide con el Manuel Vilar, tenente de alcalde do municipio, que asegura que "non era nin de Baiona". "Tentou rebentar o acto, pero viuse só", engade, e salienta que no concello (gobernado en coalición polo PPdeG e Coalición Miñorana, ao que pertence) "estamos abertos a todas as ideas". Proba diso son as charlas que organiza alí o Igadi e nas que participan entre outros o embaixador de Bolivia, lembra Vilar.

O exaltado marchou do lugar sen ser identificado pola Policía e David Nieves puido continuar co seu discurso, cheo de palabras críticas cos tempos pasados máis conciliador para os presentes: "Hoxe queremos manifestarlle sinceramente o noso respecto ao Reino de España e ao goberno español, que compón un estado democrático que nada ten que ver con aquel reino das Españas escurantistas, que someteu Galiza cun plan chamado doma e castración".

"Castellanos de Castilla"
Ademais, o representante gobernamental repasou o importante labor desempeñado por algúns dos galegos máis ilustres e os seus descendentes en Venezuela. Así citou, por exemplo, ao ministro de Vivenda, Farruco Sexto; á ex ministra de Traballo, María Cristina Iglesias; e ao o director do xornal Aporrea, Gonzalo Gómez Freire.

Por último, sinalou Nieves: "Agora que empezo a ler á súa gran poeta nacional, a precursora do rexurdimento da súa cultura, Rosalía de Castro, comezo a saber e comprender o pobo galego cando ela exixe nun dos seus poemas: "Castellanos de Castilla tratade ben os galegos; cando van, van como rosas, cando vén, vén como negros".

O acto finalizou coa colocación de tres coroas de loureiro no monumento Encontro entre dous mundos, coa interpretación dos himnos galego e español a cargo da banda de música da Escola Naval de Marín e co disparo de dez salvas dende os canóns da fortaleza Conde de Gondomar. Ademais, entregóuselles o Premio Entreculturas, dotado con seis mil euros, ao Centro de Lalín en Bos Aires e ao Concello de Ponteareas, onde tamén goberna o PPdeG.


4,64/5 (11 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



David Nieves, na súa intervención en Baiona o pasado domingo (clique para ampliar)
David Nieves, na súa intervención en Baiona o pasado domingo (clique para ampliar)
O presiedente da Deputación de Pontevedra, Rafael Louzán, na entrega do premio Entreculturas ao alcalde de Ponteareas, Salvador González Solla
O presiedente da Deputación de Pontevedra, Rafael Louzán, na entrega do premio Entreculturas ao alcalde de Ponteareas, Salvador González Solla