Vieiros

Unha vintena de membros da asociación V de Vivenda encerráronse hai un par de semanas no vestíbulo dunha sucursal dunha entidade bancaria madrileña. Decorárona e okupárona afirmando que os bancos e caixas son "os máximos culpábeis da crise económica actual", e reivindicaron que o acceso á vivenda sexa un servizo público, como a Sanidade ou a Educación, reclamando o "aluguer social universal". (Podes ver aquí as fotos da acción).

"Desde VdeVivenda pensamos que neste momento crítico a cidadanía debe tomar a iniciativa e propor a súa propia solución ao problema da vivenda", sinalan desde a organización. Para o movemento o Aluguer Social Universal sería unha posíbel solución que revertería a situación e axudaría a saír da crise actual. Algunhas das medidas que engloba este movemento cidadán para garantir o dereito á vivenda digna son:

-Creación dun parque público de vivenda en aluguer, cun prezo baseado no custo de mantemento do inmoble, usando para iso a gran cantidade de vivendas baleiras que hai no Estado Español, calculado ao redor das 4 millóns e medio de vivendas baleiras sen contar segundas residencias, tal e como explica o portavoz de V de Vivenda, Daniel Jiménez.

-Cambio da lei hipotecaria de forma que calquera que non poida afrontar o pago ao banco nunca teña que responder máis aló do prezo de poxa da casa ante o banco.

-Nada de diñeiro público para entidades privadas, rexeitamento frontal aos plans de usar o Instituto de Crédito Oficial para doarlles 3.000 millóns aos construtores, nin ás inxeccións de diñeiro público por medio do Banco Central Europeo.

-Despenalización do uso de vivendas baleiras para vivir ou crear espazos sociais.

Segundo a organización o aluguer social acabaría coas dificultades para acceder á compra e o aluguer dun piso. "Non estamos propondo nada desatinado", di Jiménez. Algúns partidos políticos como Os Verdes de Europa xa se interesaron pola proposta do "aluguer social".