Vieiros

Xa están en Galiza os corpos dos militares Xoán Andrés Suárez García -natural de Mieres (Asturias) mais residente en Carballo dende hai dez anos- e Rubén Alonso Ríos- nado en Vigo-, que morreron en Afganistán esta fin de semana logo dun ataque talibán.

Á súa chegada á base que o Exército español ten na localidade pontevedresa de Figueirido, este martes á mañá, realizouse un acto relixioso en que participaron varios representantes institucionais da Xunta e mais do Estado.

Entre os membros do Goberno estaban o presidente, Emilio Pérez Touriño, e o vicepresidente, Anxo Quintana, así como as conselleiras de Política Territorial, María Xosé Caride, e de Sanidade, María Xosé Louro. Tamén asistiu o presidente do PPdeG, Alberto Núñez Feijóo.

Ademais, estiveron presentes, entre outros, o presidente do goberno español, José Luís Rodríguez Zapatero, e varios ministros do seu executivo.