A localidade alemá, coñecida popularmente polo conto dos irmáns Grimm, volve estar infestada de ratas.
Selo austíaco de 1998
Hamelin, no Estado de Niedersachsen (Baixa Saxonia), ao norte de Alemaña, precisa un novo frautista. A localidade inmortalizada no conto dos irmáns Grimm polo cazador que a liberou das ratas con música volve ter problemas cos roedores, segundo informa a axencia de noticias DPA.
As ratas "multiplicáronse de xeito explosivo", afirma un portavoz municipal. Viven refuxiadas nuns terreos baldíos nos arredores do casco urbano e ameazan unha urbanización veciña, apuntou este mesmo funcionario. O concello non pode actuar xa que non está do todo claro quen é o propietario dos terreos, mais instalou trampas en todo o perímetro.
Segundo a lenda documentada polos irmáns Grimm, Hamelin estaba infestada de ratas no ano 1284. Un descoñecido que dicía ser un cazador especializado nesta especie chegou á vila. Contratárono e prometéronlle unha moeda pola cabeza de cada unha. O home aceptou. Sacou as ratas dos seus agochos cunha melodía que tocaba coa súa frauta e guiounas ao río Weser, onde morreron afogadas.
Mais despois os veciños de Hameln -que é como se lle di en alemán- negáronse a pagar. O frautista encantou os nenos do lugar coa súa música, levounos para unha cova e nunca máis deles se soubo. Desta volta seguro que se o cazador volve aparecer, os cartos non han ser problema.